Sykkelferie - Holiday by bike

Frå Bergen er det lett å ta med sykkelen på båten til Danmark. Morgonen etter kan ein gå i land i Hanstholm og ta fatt på den største motbakken, som er opp frå kaien. Eg set kursen sørover langs med vestkysten. Her er ikkje sykkelveg, men lite trafikk på denne tida av døgnet. Etter ei kort stund ser landskapet slik ut:


Nokre kilometer seinare skimtar eg den vesle fiskarlandsbyen Klitmøller. Dit er det høveleg langt å sykla før frukost. Her finst eit konditori med utandørs terasse, og ved snuplassen lenger ute mot sjøen ligg ein liten fiskebutikk som serverer silderettar og andre delikatesser frå havet. Her har det tradisjonelle fiskarlaget sine sjøhus. Fargerike båtar ligg bortover på stranda. Ja, dette er utlandet, altså er eg på ferie.

"Jeg er havren, jeg har bjeller på - mer enn tyve har jeg på hvert strå" står det i songen. På sykkel langs vegen er det freistande å sjå etter om det stemmer. Og hvis det ikkje er havre, så er det kanskje bygg, og då er spørsmålet: to, fire eller seks raders bygg? Eller er det raps eller ryps, råstoff til matolje eller biobrensel? Og i kva mønster ligg halmballane? Lukta langs vegane er eit kapittel for seg, grisefarmar er ikkje av dei mest attraktive.

Inne i småbyen Thisted vert syklane parkert for ei stund. Det skal bli godt med ein velfortent lunsj - på ein fortauskafe, om det ikkje var for denne idiotisk, plagsomme vepsen. Stamkafeen er "Vores cafe". Det er lenge til båten går.

Men vil du oppleva korleis sykkelen blir prioritert som transportmiddel, så dra til:

Sykkelbyen Odense

Til Odense kjem eg med tog og trillekoffert. Her skal eg leiga sykkel for å sjå meg litt omkring. Førsteintrykket på stasjonen er imponerande. Her er eg komen til ein verkeleg sykkelby. Heilt problemfritt er det likevel ikkje. På internett sida står det mellom anna: "Odense Cykelby har ansat en mand til at rydde op i byens cykelstativer. Overalt står efterladte cykler, som fylder op i stativerne. "

Ved nærare ettersyn finn eg fleire parkerte syklar i underjordiske garasjeanlegg like ved stasjonen. Syklane er parkert i toetasjes stativ med lås. Her er det tilsyn og tilgjenge heile døgnet. Kan vi ein gong få anlegg som dette i Bergen?

Etter å ha lånt sykkel går turen til møtestaden "Munkestuen" og "Den gamle kro". Litt praktisk informasjom om kva ein skal sjå etter når ein syklar rundt i denne byen kan vera greit å få med seg. Trillekofferten er ein praktisk tilhengjar til sykkelen.

Odense kommune har prøvd ut utruleg mange tiltak for å auka bruken av sykkelen som transportmiddel. Byen er blitt ein sykkelseminarby som tek i mot interesserte fagfolk, som vil sjå og høyra om det som er gjort - og få betalt av avbeidsgjevaren sin. Hotell og kro-næringa har gode inntekter av dette. Litt ferie for dei tilreisande er det og. Kommunen må stilla med lærekrefter og guidar.
Den kommunale guiden understrekar at sykkelen kan brukast av alle til alle slags formål her i byen. Sykkelen er ikkje berre for dei som driv sport. Sjølv er ho lett å kjenna på fottøyet.


Mange firma har eigne syklar til sine tilsette. Den kommunale heimehjelpstenesta, politiet, sjukehuset, og andre store arbeidsplassar har eigne sykkelordningar.

Og her kjem posten - på sykkel. Postmannen parkerer på fortauet og forsvinn inn i oppgangen. Eg nyttar høvet til å beundra sykkelvidunderet han brukar i jobben sin. Kanskje ikkje så rart at sykkelen må ha støttehjul.

I gatemiljøet inne i Odense er sykkelfelta blå. Hvis du er i det blå feltet skal du vera rimeleg trygg for biltrafikken. Men det viktigaste er kanskje at syklistane er så mange at vi vert synlege som gruppe i trafikken. For oss gjester er det litt uvant å sykla saman i grupper og måtte ta omsyn til alle dei andre syklistane som er ute i gatene.

Inne i sentrum vert talet på syklistar målt kvar dag. Her vert det stadig sett nye rekordar. Eg tek eit par ekstra rundar for å få bekrefta at det talet som står i displayet vert større. Motivasjon, konkurransar og kampanjar er ein vesentleg del av sykkelsatsinga i Odense, sjølv om det også er aktuelt å gjennomføra fleire fysiske tiltak.

I nokre hovudgater er det etablert grøn bølje, mest for dei som syklar til jobben og som vil halda janmt høg fart. Dette må prøvast - og det virkar. Hald passeleg fart slik det står på skiltet- altså 22 km/t. Så går det som ein draum gjennom alle lyskryss utan å måtte stoppa på raudt.

Dra til Danmark og Odense med sykkel. http://www.cykelby.dk/index.asp

Kysten av Belgia har breie strender med god plass til feriefolk. Her er det også fint å sykla, sjølv om det av og til kan vera ein generande vind. Bilar er det mindre plass til. Langs kysten må folk heller ta kysttrikken, de Kusttram, som har avgang kvart 10. minutt.


Denne trikkelinja er nesten 70 km lang og er grei å reisa med dersom ein vil oppleva fleire av byane langs kysten frå de Panne i sør til Knokke i nord. Fleire stader er det tilrettelagt for Park & Bike for å unngå store bilkøar langs den attraktive kyststripa.

På det meste av kyststrekninga er "strandgata" bilfri og vert nytta til mange slags aktivitetar der det er bygningar på innsida. Andre stader er strandgata ein roleg spaser- og sykkelveg langs stranda. Eit par verna sanddyner og hamneområde gjer at sykkelvegen på sjøsida ikkje er heilt samanhengande, men her er rikeleg plass. I det siste er det også sett opp fleire monumentale kunstverk som gjer kvart område større identitet. I Koksijde står denne spektakulære tårnplattforma "Acqua Scivolo" (av Anne og Patrick Poirie).

Dei nasjonale hovudvegane har ofte sykkelfelt med raud asfalt, som her nær grensa til Nederland. Grensa melom Belgia og Nederland er ikkje synleg verken på skilt eller i terrenget, men du får melding om nytt telenett på mobilen.Parkerte syklar ved jernbanestasjonar er eit interessant syn for oss som til dagleg berre ser eit fåtal syklar ved Arna stasjon. Ved stasjonen i Leuven er det ikkje lett å finna att sin eigen sykkel dersom du ikkje har notert kvar den står.

Etter ein lett sykkeltur på bilfrie vegar og langs kanalar i området nær Kempense Meren / Mol er det kjekt å kunne ta pause på ein ekte Fietskafe (sykkelkafe).

Tips: Prøv Sunparks.